標題:
肥馬《十八樓C座》歎咖啡
[打印本頁]
作者:
均諾
時間:
2008-7-3 16:27
標題:
肥馬《十八樓C座》歎咖啡
【明報專訊】為官日子踏入倒數階段嘅商務及經濟發展局 長馬時亨 ，噚日出席商台 長青時事廣播劇《十八數C座》40周年嘅記者會，仲粉墨登場客串，同「周記茶餐廳」一班街坊「周老闆」、「鬍鬚仔」、「拉表叔」一齊吹水，編劇仲改埋個劇名做《馬局長傾盡心中情》。Emily噚日都有聽節目，以第一次做廣播劇嚟講，肥馬表現都算OK啦，連周老闆都讚好。不過，「周記茶餐廳」班街坊，唔知係咪因為見到高官，忽然唔再尖酸刻薄，非常惜住肥馬。
讚周記服務好 三姑約行山
廣播劇裏面，肥馬做番自己，微服出巡到「周記茶餐廳」飲咖啡，仲大讚周記嘅咖啡香、服務好，仲扮埋劉華讚周記嘅服務態度好。班多嘴街坊見到局長，當然亦都把握機會同局長論政，鬍鬚仔就重提肥馬任內嘅仙股事件，仲玩佢最擅長嘅「食字」，話當年係「有口皆『悲』」，肥馬亦話任內每次風雲變幻，都令佢學到唔少嘢。
雖然即將離任，但馬時亨都乘機為老闆煲呔笠高帽，大讚佢係「好盡心服務市民嘅領導」，平日對煲呔一啲都唔客氣嘅周老闆，竟然都「哦、哦」聲附和，真係好少有。
繼李柱銘 之後，「三姑」都主動提出約肥馬行山，點知肥馬連講說話「漏風」嘅三姑都撩，話要先問准老婆，「未必方便同第二個女仔行山」，真係幾好笑。
肥馬嘅處子演出，雖然係「聲演」，佢一樣「七情上面」，好似重提沙士 時有憂傷、撩「三姑」時夠輕挑，聲線夠晒感情，Emily估計，肥馬嘅表現都係全靠多年來「政治騷」嘅訓練所致。
作者:
chessfung
時間:
2008-7-3 23:31
我覺得馬時享好懂得人際關係和十分親民
歡迎光臨 青年觀塘 (http://ykt.hk/forum/)
Powered by Discuz! 6.0.0